Фотоотчет

ссылки:

https://ok.ru/chvashnats/topic/66903223503632

http://chnk.ru/a/news/952.html

http://gov.cap.ru/info.aspx?gov_id=71&type=main&id=3547767 

http://www.bshig-marpos.edu21.cap.ru/?t=news&eduid=4437&news=482735

http://chuvash.org/news/15593.html

А. Г. Николаев ячĕпе хисепленекен Калайкасси вăтам шкулĕнче чăвашлăха аталанатарас ĕç малалла пырать. Кăçал Чăваш Республикинчи Амăшĕпе Ашшĕ çулталăкне тата Чăваш халăх поэчĕ Петĕр Хусанкай çуралнăранпа 110 çул тултарнине халалланă «Чăваш ачи чăвашах» фестиваль ирттерес терĕ. Ку фестивале Чăваш кунĕсем ирттернĕ шкулсене чĕннĕ. Асăнса хăвармалла, шкулсенчи Чăваш кунĕсем ирттересси - Эдуард Константинович Бахмисовăн проекчĕ. Шкулта вĕренекен мĕн пур ача тата вĕрентекен кунĕпе чăваш çи-пÿçĕпе, чăваш халăх апат-çимĕçне çисе юрласа ташлать, тăван халăх йăли-йĕркине, чăваш арчин пуянлăхне кăтартать – чăн-чăн чăваш уявĕ ирттерет. Çак уява иттерме Э. К. Бахмисов кашни шкулах виçĕ выставка илсе пынă: В. П. Иванов, В. В. Николаев, Г. Н. Иванов-Орков «Чăваш тумĕ аваллăхран паянлăха» кĕнеки тăрăх хатĕрленĕ выставка; Чăваш Республикин тава тивĕçлĕ художникĕ А.И. Бахмисовăн триптихĕ «Вăйă карти»; Э. К. Бахмисовăн «Ял уявĕсем» фотокурав. Юлашки çулсенче Эдуард Константинович тăрăшнипе республикăри вунă ытла шкулта Чăваш кунĕсем иртнĕ.

«Чăваш ачи чăвашах» фестивале уçма сумлă хăнасем çитрĕç. Вĕсем Калайкасси шкулĕнчи Е. Е. Ерагин пухса йĕркеленĕ шкул музейĕпе, Афган вăрçине халалланă музейпа паллашрĕç. Тури чăвашсен музейĕ хатĕрленĕ Чăваш Республикин патшалăх символĕсем 25 çул тултарнине халалланă курав тата «Чăваш сурпанĕсем» фотокурав хăнасене килĕшрĕ. Шкул вулавăшĕнче йĕркеленĕ Зинаида Васильевна тата Петр Яковлевич Мазуркинсен куравĕ пурне те тыткăнларĕ.

Муркаш район администраци пуçлăхĕ Ростислав Николаевич Тимофеев фестивале уçнă май Муркаш тăрăхĕнче чăвашлăха аталантарас ĕç вăйланса пынине, тăван чĕлхене упрасси кашнин тивĕçĕ пулнине палăртрĕ. Чăваш Республикин культура министрĕн ĕçне вăхăтлăх пурнăçлакан Вячеслав Николаевич Оринов ачасене чăн-чăн патриотсем тесе хавхалантарчĕ, чăваш чĕлхине юратмалли тата ытти халăх чĕлхисене хисеплемелли пирки каларĕ. Чăваш Республикин информаци политикин тата массăлла коммуникаци министрĕн çумĕ Юлия Викторовна Стройкова Калайкасси шкулĕнчен тăван чĕлхепе таса та илемлĕ калаçма пултаракан журналистсем тухасса шаннине пĕлтерчĕ. Чăваш Республикин вĕренÿ тата çамрăксен политикин специалист-эксперчĕ Ирина Алексеевна Степанова ачасене ырă çын пулса ÿсме, паянхи ăмăртура çĕнтерме ăнăçу сунчĕ. Чăваш наци конгрес президенчĕн пĕрремĕш çумĕ Валерий Леонидович Клементьев Калайкасси шкулĕ пек хастар шкулсем республикăра ытларах пулсан аван пулнине палăртрĕ. Чăваш наци конгресĕн ваттисен канашĕн ертÿçи Виталий Петрович Станьял ачасене хамăр йăла-йĕркене хисеплесси пирки каларĕ, ирхи сăвап вуласа пачĕ. Муркаш районĕн ентешлĕх ертÿçи Владимир Геннадьевич Тяпкин тăван чĕлхе тăван килтен аталаннине палăртрĕ, чăваш чĕлхипе калаçма ниçта та вăтанмалла мар тесе пĕтĕмлетÿ турĕ. Чăваш халăх ăс-хакăлĕпе ÿнер академийĕн президенчĕ Евгений Евстафьевич Ерагин тăван ен культурине тĕпчесси пирки чарăнса тăчĕ. Юлашкинчен Саида Усмановна Колдашова «Чăваш ачи чăваш пулса ÿсет» çĕнĕ юррипе, фестиваль гимнĕпе паллаштарчĕ.

«Чăваш ачи чăвашах» фестиваль Калайкасси шкулĕнче пуçласа иртет. Фестивальре хутшăнакансем хăйсен пултарулăхне виçĕ ăмăртура кăтартма пултарчĕç.

«Вĕрентетпĕр чăвашла» ăмăртура чăваш чĕлхи предметне вĕрентмен учительсем хутшăнчĕç, чăвашла уроксем кăтартрĕç. Тÿресем урока йĕркеленине, темăна интереслĕ те кăсăклă пама пултарнине, тăван халăх историйĕпе культурине урок темипе çыхăнтарма пĕлнине, вĕрентекен пуплевĕн пахалăхне, чăвашла тĕрĕс те таса калаçма пултарнине, урокра тĕрлĕ меслетсемпе мелсене усă курма, ачасене хавхалантарса ĕçлеттерме пĕлнине хакларĕç. Тÿресен шучĕпе «Чăвашлăха аталантаракан чи хастар вĕрентекен» ята Калайкасси шкулĕнче акăлчан чĕлхи вĕрентекен Любовь Степановна Горшкова тивĕçрĕ. Ăна медальпе тата дипломпа чысларĕç. Ытти вĕрентекенсен урокĕсем те кăсăклă та интереслĕ пулчĕç. Уйрăмах Сĕнтĕрпуç шкулĕнчен килнĕ Елизавета Викторовна Матюшова урокне ырăпа асăнмалла. Калайкасси шкулĕнче физика предмета вĕрентекен Ольга Васильевна Михайлова 10-мĕш класра «Ом законĕ» темăпа ирттернĕ урок та куракансемшĕн кăсăклă пулчĕ.

Уçă уроксем панă хыççăн вĕрентекенсем «Чăваш чĕлхине аталантарассин тĕп туртăмĕсем» çавра сĕтелте хăйсен шухăшĕсене палăртрĕç, тухса калаçрĕç. Çавра сĕтеле йĕркелесе ертсе пыраканĕ Калайкасси шкулĕнче чăваш чĕлхипе литературине вĕрентекен Александр Марсович Степанов пулчĕ.

«Савăнатăп эп чăваш пулнишĕн» ăмăртура 3-4 классенче вĕренекен ачасем чăваш халăхĕн йăлине кăтартса пачĕç. Калайкасси шкулĕнче 3-мĕш класра вĕренекен маттур ачасем Çăварни уявне кăтартрĕç, 1-мĕш вырăн çĕнсе илчĕç. Маттур ачасене кубок тата торт парнелесе хавхалантарчĕç. Шупашкар районĕнчи Çÿлтикасси вăтам шкулĕнчи ачасем Мăнкун уявĕпе халăха тыткăнларĕç, 2-мĕш вырăна тивĕç пулчĕç. Сĕнтĕрвăрри районĕнчи Сĕнтĕрпуç шкул ачисем чăваш вăййине кăтартса 3-мĕш вырăна тухрĕç.

Ăмăрту вĕçленсен кĕçĕн классемпе Катькас ял вулавĕшĕн ĕçтешĕ Анжелика Васильевна Угарова «Вулавăшри пĕр кун» вăйă-урок ирттерчĕ.

«Сар каччăпа сарă хĕр» ăмăртура 8-9 классенче вĕренекен яш-кĕрĕм чăваш халăх историпе культурине, чĕлхипе йăли-йĕркине пĕлнине ăс-тăн вăййинче кăтартса пачĕ. Пĕрремĕш вырăна Шупашкар районĕнчи Çÿлтикасси вăтам шкулĕнче вĕренекен Ефимов Александрпа Ефимова Татьяна çĕнсе илчĕç. Вĕсене «Сар каччăпа сарă хĕр» кубокпа тата пылак парнепе чысларĕç. Иккĕмĕш вырăна Калайкасси шкулĕнче вĕренекен Сальникова Иринăпа Сергиванов Владимир тухрĕç. Виççĕмĕш вырăна Сĕнтĕрвăрри районĕнчи Сĕнтĕрпуç шкулĕнче вĕренекен Колесникова Алинăпа Воронков Антон тивĕçрĕç.

5-11 классенче вĕренекен ачасем чăваш вăййисене пĕлнипе кăтартрĕç. Кашни класс «Татăкла», «Çĕрĕ памалла», «Çăмхалла», «Ÿхăçăлла», «Чĕн пиçихилле», «Кайăкла», «Мăнкун çăмартилле», ÿсен-тăран ячĕсене пĕлмелле вылярĕ.

Уяв вăйă картипе вĕçленчĕ. Халăх кĕввипе киленсе, чăваш тумĕ тăхăннă 250 çын спорт зал тулли карталанса утрĕ. Виçĕ пысăк унка тăрсан вăйă карти варринче чăваш юрри-ташши хуçаланчĕ. Юлашкинчен сумлă хăнасем «Чăваш ачи чăвашах» фестивале пĕтĕмлетсе çĕнтерÿçĕсене чысларĕç.

«Чăваш ачи чăвашах» фестиваль пĕрремĕш хут кăна иртет пулсан та интереслĕ те кăсăклă пулчĕ. Ку фестиваль кун-çулĕ вăрăм пуласса, хутшăнакансен йышĕ çултан çул ÿссе пырасса шанас килет.