Кашни чăваш ака уйăхĕн 25-мĕшĕнче Чăваш чĕлхи кунне уявлать. Кăçал çак кун уйрăмах паллă: чăваш халăхне çутта кăлараканăмăр, Аслă Вĕрентекенĕмĕр Иван Яковлевич Яковлев çуралнăранпа 170 çул çитрĕ. Çав ятпа Шупашкарта И.Я. Яковлев палăкĕ умĕнче «Анлă янăра, чăваш чĕлхи!» флешмоб ятпа митинг иртрĕ.  Уява чăваш чунлă çынсем: вĕренекенсемпе вĕрентекенсем, культура тата ÿнер ĕçченĕсем, студентсем пухăннă. Митингра тӑван чӗлхе пӗлтерӗшӗ пирки калаҫнипе пӗрлех чӑваш юрри-такмакӗ янӑрарĕ, хастар та маттур вĕренекенсем И.Я. Яковлевăн калавĕсене вуларĕç.

       Калайкасси шкул вĕренекенĕсем те уява хутшăнчĕç. 10-мĕш класс ачисем чăваш чĕлхипе литературине вĕрентекенпе пĕрле,  Колбасова Маргарита Ильиничнăпа, уява çитсе килчĕç, Аслă Вĕрентекенĕмĕре асăнса палăк умне чечек хучĕç.